Ўзбекистон «Адолат» СДП, Олий таълим, фан ва инновациялар вазирлиги ҳамда Рақамли технологиялар вазирлиги ҳамкорлигида Ислом Каримов номидаги Тошкент давлат техника университетида «Сунъий интеллект ва келажак технологиялари: таълим тизимида илмий-амалий тадқиқотлар ва инновациялар» мавзусидаги республика илмий-амалий конференцияси ўтказилди.
Анжуманнинг асосий мақсади — мамлакатимизда сунъий интеллект ва замонавий рақамли технологияларни таълим тизимига изчил жорий этиш, рақамли иқтисодиёт талабларига жавоб бера оладиган малакали кадрларни тайёрлаш, илмий-тадқиқот фаолиятини инновацион йўналишда ривожлантириш бўйича стратегик ёндашувларни шакллантириш, шу билан бирга турли вазирликлар, олий таълим муассасалари ҳамда амалиётчи мутахассислар ўртасида тизимли мулоқот платформасини яратишдан иборат бўлди.
Тадбирда Олий Мажлис Қонунчилик палатаси депутатлари, вазирликлар ва идоралари вакиллари, мамлакатимизнинг етакчи олий таълим муассасалари профессор-ўқитувчилари, илмий тадқиқот институтлари олимлари, IT соҳаси мутахассислари, докторантлар ҳамда умумтаълим муассасалари педагоглари иштирок этди. Қорақалпоғистон Республикаси, Самарқанд, Фарғона ва бошқа ҳудудлардан тадқиқотчилар учун Zoom платформаси орқали уланиш имконияти яратилди — бу анжуманнинг республика миқёсида кенг қамровли ўтказилишини таъминлади.
Тадбирда Олий Мажлис Қонунчилик палатаси депутати, «Адолат» СДП фракцияси раиси ўринбосари, техника фанлари номзоди, доцент Муҳаммаджон Валиев «Сунъий интеллект ва илғор технологиялар — ёшлар тафаккури, инновацион фикрлаши ва тараққиётининг драйвери» мавзусида маъруза қилар экан, замонавий технологияларнинг ёш авлод дунёқарашига таъсири ҳамда қонунчилик базасини янги шарт-шароитларга мослаштириш зарурати ҳақида батафсил тўхталди.
Ўзбекистонда хизмат кўрсатган фан арбоби, академик Саидаҳрор Ғуломов масофавий уланиш орқали «Янги Ўзбекистоннинг буюк давлат бўлишида сунъий интеллектнинг роли» мавзусидаги маърузаси билан анжуманга алоҳида мазмун бағишлади. Олим сунъий интеллект — миллий иқтисодиётнинг рақобатдошлигини оширишда, давлатнинг технологик мустақиллигини таъминлашда ҳамда жаҳон саҳнасидаги интеллектуал салоҳиятини мустаҳкамлашда стратегик омил эканини таъкидлади.
Тошкент давлат техника университети «Амалий инглиз тили» кафедраси мудири, филология фанлари бўйича фалсафа доктори (PhD) Шаҳноза Адилованинг «Сунъий интеллектнинг тил таълимидаги ўрни: методлар, муаммолар ва таржимашуносликка таъсири» мавзусидаги маърузаси чет тилларини ўқитиш методикасида ҳамда таржимашунослик соҳасида сунъий интеллект имкониятларидан фойдаланишнинг амалий жиҳатларига бағишланди. Маърузачи айни вақтда бу борада юзага келаётган методологик муаммоларни ҳам асосли таҳлил қилди.
Қорақалпоғистон Республикасидан, Нукус шаҳридаги Инновацион технологиялар университети «Педагогика ва психология» кафедраси доценти, педагогика фанлари бўйича фалсафа доктори Нурлан Бегалиев анжуманда онлайн иштирок этиб, «Замонавий таълимда сунъий интеллект: янги давр педагогикаси» мавзусидаги маърузасида рақамли муҳит ўқувчилардаги янги когнитив маҳоратларни шакллантиришга нечоғлик таъсир этаётганини ва педагогика илмига янги тадқиқот йўналишларини қандай очаётганини баён қилди.
Тошкент вилояти Ангрен шаҳридаги 21-сонли умумий ўрта таълим мактаби математика ва информатика ўқитувчиси, техника фанлари бўйича фалсафа доктори Ирина Баймуратова таълимда сунъий интеллектдан фойдаланишнинг ижобий ва салбий жиҳатлари мавзусида маъруза қилди. Маъруза умумтаълим тизимида СИ воситаларидан фойдаланишнинг амалий тажрибаси ҳамда бундай ёндашувнинг муаммоли жиҳатларининг балансланган таҳлили билан диққатга сазовор бўлди — бу маъруза мактаб таълими амалиётидан келиб чиққан ҳолда айни долзарб муаммоларни ҳаётий мисолларда очиб берди.
Тошкент ахборот технологиялари университети Самарқанд филиали «Сунъий интеллект ва маълумотлар таҳлили» кафедраси профессори Холида Примова масофавий уланиш орқали «Сунъий интеллект асосида таълим сифатини баҳолаш ва ташхислаш учун норавшан мантиқий алгоритмларни ишлаб чиқиш» мавзусида маъруза қилиб, таълим сифатини объектив баҳолашнинг алгоритмик ёндашувини ҳамда бу борада илмий тадқиқотларнинг ҳозирги ҳолатини тақдим этди.
Рақамли технологиялар вазирлиги ҳузуридаги Рақамли технологиялар ва сунъий интеллектни ривожлантириш илмий-тадқиқот институти тадқиқотчиси Абдуғофур Раҳимовнинг «Таълим соҳасида рақамли технологиялар ва сунъий интеллектнинг амалий татбиқлари» мавзусидаги маърузаси давлат миқёсида амалга оширилаётган рақамли лойиҳалар ҳамда уларнинг таълим тизимига жорий этилиш истиқболларига бағишланди.
Фарғона давлат техника университети «Компьютер муҳандислиги ва сунъий интеллект» кафедраси докторанти Раҳмиддин Рўзалиев Zoom орқали қилган «Сунъий интеллект технологияларининг таълим тизимидаги ўрни: илмий-амалий ёндашувлар ва ижтимоий масъулият» мавзусидаги маърузасида янги технологияларни жорий этиш жараёнида этик ва ижтимоий-маънавий жиҳатларга алоҳида эътибор қаратиш зарурлигини асосли далилларга кўра кўрсатиб берди.
ТДТУ докторанти Қобилжон Мухиддиновнинг «Сунъий интеллект ва рақамли трансформация шароитида иқтидорли талабаларни илмий-тадқиқот ҳамда стартап фаолиятига йўналтиришнинг замонавий стратегиялари» мавзусидаги маърузасида ёш тадқиқотчиларни инновацион тадбиркорлик соҳасига жалб қилишнинг замонавий механизмлари таҳлил қилинди.
Темурбек Доминов ўз навбатида «Сунъий интеллект ёрдамида инновацион маҳсулотларни ривожлантириш ва тижоратлаштириш истиқболлари» мавзусидаги маърузасида университет илмий ишланмаларини бозорга чиқариш йўлларини ва тижоратлаштиришнинг замонавий моделларини баён қилди.
Конференция якунида «Адолат» СДП, ҳамкор вазирликлар ва таълим муассасалари ўртасида сунъий интеллект соҳасидаги ҳамкорликни янада мустаҳкамлаш, қўшма лойиҳаларни амалга ошириш ҳамда илмий-амалий ишланмаларни қўллаб-қувватлаш бўйича принципиал келишувларга эришилди.