Биз бугун ривожланиш ёки аҳоли фаровонлигини юксалтириш ҳақида фикрлар эканмиз, албатта, бу учун мамлакатимиз иқтисодиётининг ўсиши барқарор бўлиши лозим, деган хулосага келамиз. Шундан келиб чиқилса, мамлакат иқтисодиётининг барқарор ривожланишида йирик, ўрта ва кичик тадбиркорликнинг ўрни ниҳоятда муҳим. Тадбиркорлик ва сармоя учун қонунчиликда яратилган имкониятлар ҳамда шарт-шароитлар соҳанинг кенгайишига ва аҳолини иш билан таъминлашга бевосита таъсир қилади.
Давлат томонидан тадбиркорликни ривожлантиришга қаратилган сиёсат, амалга оширилаётган чора-тадбирлар, қонунчиликнинг такомиллаштирилиши, тадбиркорларга рўйхатдан ўтишдан тортиб, солиқ соҳасида бир қатор енгилликлар яратилгани, кредит ва ер ажратилиши ҳамда бошқа масалалардаги кўплаб имтиёзлар ўз натижасини бермоқда. Мамлакатимизда иқтисодиётни эркинлаштиришга, иқтисодиётда давлат улушини камайтиришга, тадбиркорлар сафини, айниқса, кичик ва ўрта бизнесни ривожлантиришга катта аҳамият берилмоқда.
Шу ўринда айтиш жоизки, ”Адолат” СДП Сайловолди дастуридаги ғоя ва мақсадларда ҳам мамлакатимизда иқтисодиётни эркинлаштириш ҳамда рақобатбардош, коррупциядан холи тадбиркорлик муҳитини яратиш фикри илгари сурилган. Шу боис, биз бугунги кунда мамлакатимизда тадбиркорликни ривожлантириш, иқтисодиётнинг барқарорлигини таъминлаш, унга ғов бўлаётган тўсиқларга барҳам бериш бўйича олиб борилаётган ислоҳотларни тўғри ва жуда муҳим, деб ҳисоблаймиз.
Аввало, тадбиркорлар сафи йилдан-йилга кенгайиб, мамлакат иқтисодиётида тутган ўрни тобора юксалаётгани эътирофга лойиқ. Эътибор берадиган бўлсак, 2024 йилнинг биринчи ярим йиллигида 28,5 минг нафар тадбиркор ўз фаолиятини йўлга қўйган. Тадбиркорлик учун 65,5 триллион сўм кредит ажратилган. Эътибор беринг, бу ўтган йилнинг шу даврига нисбатан 50 фоизга кўп дегани. Яна бир аҳамиятли томони, мамлакатимизда яратилаётган қулай инвестициявий муҳит ташқаридан инвесторларнинг кириб келиши, ўз сармоялари билан тадбиркорликни амалга оширишига ҳам имкон бермоқда. Хусусан, 2024 йилнинг 6 ойи давомида мамлакатимизга тадбиркорлик учун 15,5 миллиард долларлик сармоя киритилган бўлса, шундан 13,9 миллиард долларлик сармоя тўғридан-тўғри киритилган.
Хабарингиз бор, республикамизда ҳар йили 20 август “Тадбиркорлар куни” сифатида нишонланади. Шу муносабат билан улар учун мавжуд муаммо ва таклифлар бўйича енгилликлар яратиб берилмоқда. Қабул қилинаётган кўплаб фармон ва қарорлар, қонунларга киритилаётган ўзгартириш ва қўшимчалар уларнинг яратувчилик фаолиятини яхшилашга хизмат қилмоқда.
Қорақалпоғистонда бўлиб ўтган очиқ мулоқотда ҳам Президент тадбиркорлар учун қўшимча шарт-шароитлар яратиш бўйича муҳим ташаббусларни илгари сурди. Улардан бири кичик ва ўрта бизнес учун молиявий ресурсларни кўпайтириш орқали тадбиркорларни қўллаб-қувватлашдир. Ушбу таклифнинг ўртага ташланиши бежиз эмас. Чунки жорий йил бошидан 35 мингдан ортиқ тадбиркорга 3,5 триллион сўм микрокредит ажратилди. Натижа эса аъло. Шу пайтгача халқимиз учун минглаб иш ўринлари яратилди ва оилалар даромади кескин ошди. Шунингдек, ўрта ва кичик бизнес учун ажратиладиган микрокредитлар ҳажми 100 миллиондан 300 миллионга оширилди. Ушбу тадбиркорлик турлари учун эндиликда йилига 10 триллион сўм маблағ бериладиган бўлди.
Тадбиркорлар билан бўлиб ўтган очиқ мулоқотда хорижда бизнесини йўлга қўйган 40 дан зиёд ватандошимиз иштирок этиб, Қорақалпоғистон шароити билан танишди. Шунингдек, ҳар бир туман кесимида “Қорақалпоғистонда бизнес қилинг!” дастурининг ишлаб чиқилиши натижасида саноат, қишлоқ хўжалиги ва хизматларни ривожлантириш учун яна камида 10 миллиард долларлик сармоя ва 500 минг иш ўрни яратиш имкони борлиги алоҳида эътирофга лойиқ.
Очиқ мулоқотда тадбиркорларнинг товар айланмаси ўтган йилга нисбатан 25 фоизга кўпайиб, 986 триллион сўмга етганлиги, йиллик айланмаси 10 миллиард сўмдан 100 миллиард сўмгача бўлган ўрта корхоналар сони 2 баробарга кўпайганлиги, йиллик айланмаси 100 миллиард сўмдан ортиқ йирик корхоналар эса 2 минг 200 тадан ошганлиги, солиқ, банк, молия, бутун иқтисодиёт комплекси “маҳаллабай” ва “мижозбай” иш юритиши натижасида олдин зарар билан ишлаган 16 мингта корхона ярим йилда 6,5 триллион сўм фойдага эришганлиги эътироф этилди.
Шунингдек, Президент ўз нутқида бу йилги очиқ мулоқот айнан Қорақалпоғистонда ўтказилаётганини изоҳлар экан, бунга асосий туртки Қорақалпоғистонда бизнес учун бошқа бирорта ҳудудда йўқ 50 дан ортиқ имтиёзлар пакети яратилганлигини, Қорақалпоғистонда ер ажратишнинг содда тизими жорий этилганлигини ҳамда бу ўлка катта бозорларга чиқиш учун энг қулай ҳудуд эканлигини алоҳида таъкидлаб ўтди. Шунингдек, очиқ мулоқотда тадбиркорликка тўсиқ бўлаётган муаммо ва камчиликлар ҳамда уларнинг ечими бўйича аниқ таклиф ва ташаббуслар ҳам илгари сурилди.
Шуни ишонч билан айтиш мумкинки, тадбиркорлар билан ўтказилаётган бу каби мулоқотлар ва уларда билдирилган ташаббус ҳамда таклифлар соҳада олиб борилаётган ислоҳотларнинг давоми сифатида янада кенг имкониятлар эшигини очиб беради.