Суднинг қора курсида ўтирган 21 ёшли М.А. муқаддам фирибгарлик жиноятини содир этганлиги учун судланган. Аммо М.А. бундан тегишли хулоса чиқармади. Аксинча, у вояга етмаган икки ўспиринни ўғирликка шерик қилади.
Улар ўтган йилнинг 3 июль куни соат 01.30 ларда Яккасарой тумани Муқимий кўчаси 3-уй олдида турган “Nexia-3” русумли автомашина ичидан 7 миллион сўм нақд пулни ўғирлаб, воқеа жойидан яширинишади. Олиб борилган тезкор қидирув ва суриштирув давомида М.А. ушланади.
Судланувчи М.А. суд мажлисида айбига иқрор бўлиб, вояга етмаган икки ўспиринни танишини, улар ўша куни кечаси овқатланиш мақсадида кафега киришганини баён қилди. Кафедан қайтиб чиқишгач, автомашинани кўришган. Шундан кейин у автомашинанинг эшигини очиб, салондан 7 миллион сўмни олишганини тан олди.
– 2 июль куни тахминан 21 ларда уйга келдим, – деди судда жабрланувчи. – Машинани уй олдига қўйиб, пульт билан қулфладим. Эртаси куни эрталаб кўчага чиқиб, машинамга қарасам, ҳамма томони очиқ. Багаж ва салондаги нарсалар ёйилиб ётибди. Шундан кейин “102” га хабар қилдим. Ўғрилик натижасида автомашинага ҳеч қандай зарар етказилмаган. Эшик қулфлари бузилмаган. Ҳужжатлар жойида эди. Фақат 7 миллион сўм пул ўғирланган. Менга етказилган зарарни тўлиқ қоплашди. Шунинг учун уларга нисбатан ҳеч қандай моддий ва маънавий даъвойим йўқ. Ўғрилик қилган йигитга нисбатан енгилроқ жазо беришингизни сўрайман.
Суд М.А.ни ўғрилик ва бошқа жиноятни содир этганликда айбли, деб топди. Унга Ж.К.нинг тегишли моддаси тартибида тайинланган жазога жиноят ишлари бўйича Олмазор туман судининг 2021 йил 27 майдаги ҳукми билан тайинланган жазонинг ўталмай қолган қисмини қисман қўшиш йўли билан узил-кесил 3 йил муддатга озодликдан маҳрум қилиш жазоси тайинланди. М.А. тайинланган жазони қаттиқ тартибли колонияда ўташи белгиланди.
А.ЖАЛИЛОВ,
Жиноят ишлари бўйича Яккасарой туман судининг раиси