Байроқ – давлат рамзи ҳисобланади. Давлатлар тарихининг барча даврларида байроқ Ватан тимсоли сифатида муқаддас саналган. Байроқ остида эл бирлашган, жипслашган. «Давлат байроғи тўғрисида»ги Ўзбекистон Республикаси қонунининг 2-моддасида “Ўзбекистон Республикасининг Давлат байроғи Ўзбекистон Республикаси давлат суверенитетининг рамзидир”, деб белгилаб қўйилган. Миллий ғуруримиз саналган байроғимиз ўзида бутун Ўзбекистон халқининг асрий орзу-истаклари, ғайрати ва шижоатини мужассам этган.
Тошкент вилояти Зангиота туманидаги Чорсу қўрғонида байроғимиз қабул қилинган кун муносабати билан “Адолат” СДП Марказий аппарати ҳамда Ўзбекистон Республикаси Жамоат хавфсизлиги университети ҳамкорлигида “Байроғимиз – фахримиз!” мавзусида маънавий-маърифий тадбир ташкил этилди.
Тадбирни Ўзбекистон Республикаси Жамоат хавфсизлиги университети бошлиғининг тарбиявий ва мафкуравий ишлар бўйича ўринбосари полковник Икромжон Маҳмудов ҳамда “Адолат” СДП Сиёсий Кенгаши раиси ўринбосари Абдукамол Рахмонов очиб беришди.
Тадбирда Олий Мажлис Қонунчилик палатаси депутати Муҳаммаджон Валиев “Давлатим байроғи — фахрим, ғурурим!” мавзусида қилган маърузасида байроғимиз юртимизда ҳукм сураётган тинчлик, ободлик, миллатлараро тотувлик, қут-барака, биз эришаётган бемисл ютуқлар ва келажакка бўлган мустаҳкам ишонч рамзи сифатида қалбимизга туганмас ифтихор бағишлаши хусусида сўз юритди. Йиғилишда ижтимоий-гуманитар фанлар кафедраси доценти Нодира Расулова “Давлат байроғи – миллат ифтихори”, Давлат ҳуқуқий фанлар ва инсон ҳуқуқлари кафедраси бошлиғининг ўринбосари, юридик фанлар бўйича фалсафа фанлар доктори Элдор Ҳомидовнинг “Ўзбекистон Республикаси байроғи – халқимизнинг ажралмас ифтихори” каби маърузалари тингланди.
Тадбир давомида йиғилганлар эътиборига ҳавола этилган куй-қўшиқлар тадбир иштирокчиларига байрамона руҳ бағишлади.
“Адолат” СДП Матбуот хизмати