Доктор Солиҳ Салмон айтади:
“Оёқлари туғма шол, 23 йил ногиронлар аравачасида юрган бир йигит қабулимга келди.
Орқасига йирингли яра тошган экан.
Яраларига игна ёрдамида дори қўйдим, бир тарафдан эса кесиб йирингини тозалаяпман.
Ўзимча бу ёш йигитни даъват қилгим келди.
Жуда ҳам ҳушчақчақ йигит эди.
Ҳеч сиқилиш, аламзадалик, ҳолидан шикоят йўқ.
– Сен туғма шолмисан? – дедим.
– Ҳа, – деди у.
– Демак ҳеч юрмадинг, югурмадинг, ўйнай олмадинг, шундайми? – дедим.
Йигит саволимни эшитмаганга олди.
Мен бўш келмадим. Бу сафар мўлжални аниқ олдим.
– Ҳамма арзимаган нарсаларда ҳам қаттиқ асабийлашади, масалан, телефоним эски, бузиқ дейди. Эрим билан тортишдик, дейди. Хотиним аразлайверади, дейди. Нархлар қиммат, дейди. Болам йиғлоқи, дейди. Пулим йўқ, дейди. Ишларим юришмаяпти, дейди. Бўлар-бўлмас нарсаларни дард ҳисоблайди. Сен эса шунча дардинг билан ҳеч нарса демаяпсан…
Гапимни тугатмасимдан йигит:
– Мен кетишни хоҳлайман, дори қўйишни тўхтатинг, – дея хонамдан чиқиб кета бошлади.
Мен бунинг сабабини сўрадим.
Шунда йигит мени йиқитган жавобни берди:
– Сен Роббим билан орамни бузишга ҳаракат қиляпсан. Мени бутун неъматларга кўмган Роббим фақатгина оёқлар бермади. Ва бу билан мени имтиҳон қиляпти. Мен ақлимни таниган куним Роббимга сўз берганман. Роббимдан ҳеч кимга шикоят қилмайман. Сабрим эвазига жаннатини берадиган Зотдан сенга ҳам шикоят қилмайман…
Беш мингта жарроҳлик амалиёти ўтказдим. Бирор марта пичоқ ёки қайчим қўлимдан тушиб кетмади. Аммо бу йигитнинг гапидан сўнг қўлимдаги асбоблар ер билан битта бўлди.
Биринчи марта касал эмас, ҳаяжондан мен титраётган эдим.
Бу сафар ёрдамга муҳтож касал мен эдим.
Шундан кейин қачон дунё ташвишлари маҳзун қилса, сиқилсам, асабларим ўзимга бўйсунмаса шундай дейман: “Туғма шол, ўша ҳолида ҳам шикоят қилмайдиган йигит эсингдами? Ана унда сен ҳам дардлар, синовлар эвазига жаннатни берадиган жаннат эгасидан шикоятчи бўлма!”
Ўшанда менинг кўзимга бечора кўринган, насиҳат қиламан, Аллоҳни эслатаман деб бел боғлаган касалимдан бир умрлик насиҳатни, унутилмас дарсни олганман.
Аслида бечора ўзим эканман…