Президент Шавкат Мирзиёев Қорақалпоғистон Республикаси Жўқорғи Кенгесининг мурожаатини ҳамда ҳудудда жамоат тартиби тикланганлигини, фуқароларнинг хавфсизлиги, уларнинг ҳуқуқ ва эркинликлари ҳимояси таъминланганлигини инобатга олиб, Қорақалпоғистон Республикаси ҳудудида фавқулодда ҳолатнинг амал қилишини 21 июль куни соат 05:00 дан бошлаб муддатидан аввал тугатиш тўғрисидаги фармонни имзолади.
Фавқулодда ҳолатнинг муддатидан олдин тугатилганлиги жамоатчилигимиз томонидан қизғин қўллаб-қувватланмоқда. Ўз вақтида кўрилган чоралар, ўрнатилган қатъий тартиблар сабаб, давлатимиз ва жамиятимиз ҳаётига таҳдид солиши мумкин бўлган мудҳиш ҳолатларнинг олди олинди. Айнан мана шундай оқилона сиёсат сабаб, Қорақалпоғистонда фавқулодда ҳолат режимини муддатидан олдин бекор қилишга муваффақ бўлинди.
Қорақалпоғистондаги айрим қўштирноқ ичидаги халқпарварлар бошлаган қутқу сабаб оддий халқ азият чекди. Ваҳоланки, ўзбеклар билан азал-азалдан меҳр-оқибат туйғулари билан чамбарчас боғланган, бир тану бир жон бўлиб Ватани ва давлати ривожи йўлида сидқидилдан меҳнат қилиб келувчи қорақалпоқ халқи ардоқ ва эъзозга муносибдир. Ўзбекистон Республикаси Бош қомусида белгилаб қўйилганидек, давлатимиз фуқаролари давлат ва жамият олдидаги мажбурият ва бурчларини тўлақонли адо этган ҳолда, қонунларимизда кўрсатилган барча ҳуқуқ ва эркинликлардан фойдаланиш ҳуқуқига эгадирлар.
“Адолат” СДП Сиёсий Кенгаши Президентимизнинг Қорақалпоғистонда ўрнатилган фавқулодда ҳолат режимини муддатидан олдин тугатиш борасида имзолаган фармонини ҳар томонлама қўллаб-қувватлайди. Юртдошларимизни эса барчамизнинг энг олий мақсадимиз, давлатимиз ва жамиятимизнинг фаровон ҳаёти ва ривожи йўлида ҳамиша ҳамжиҳат бўлишга чорлаб қоламиз. Зотан, Ватан ягонадир, Ватан биттадир.
“Адолат” СДП Матбуот хизмати