Айни кунларда Ўзбекистон “Адолат” СДП ташкил этилганлигининг ўттиз йиллиги билан боғлиқ тантаналар Бухорода ҳам бўлиб ўтмоқда. Партиянинг халқ орасида танилувчанлиги учун қанчадан-қанча инсонлар хизмат қилишган. Шулардан бири Пўлатжон Шароповдир. У Бухоро вилоятидан Олий Мажлис Қонунчилик палатасига сайланган дастлабки депутатлардан бири ҳисобланади. Унинг депутатлик фаолияти нафақат Олий Мажлисда, балки Ўзбекистондаги сиёсий тизимни модернизация қилиш йўлидаги тарихий ўзгаришлар билан боғлиқ.
Пўлатжон Шаропов ўзининг депутатлик фаолиятини шундай ёдга олади: «Ўшанда биринчи марта кўп партиявийлик, кўп мандатли сайлов ўтказилганди. Олдинги сайловлар бир партиявийлик ва бир мандатлик эди, бу жараён янги бўлганлиги сабабли халқ орасида муҳокамага қўйилди». Бу нафақат Пўлатжон Шароповнинг депутатлик фаолиятини, балки Ўзбекистондаги сиёсий трансформациянинг бошланишини ҳам акс эттиради.
90-йилларнинг ўрталарида, ўзгаришлар даврида, Ўзбекистон сиёсий тизими бир партиявийликдан кўп партиявий тизимга ўтиш йўлида жуда катта ўзгаришларни бошдан кечирди. Бу Ўзбекистон тарихида янги босқични бошлади. Бундай тизим халқнинг сиёсий иштирокини оширди ва ўзгаришлар жараёнини очиқ ва эркин муҳокама қилиш имкониятини яратди. Халқнинг бу янгиликни илиқ қарши олиши янги сиёсий эркинликка бўлган эҳтиёжнинг юзага чиқиши эди.
1995 йил 18-февралда Ўзбекистонда янги сиёсий партия ташкил топди. Бу партия «Адолат» номини олди ва унинг ташкил этилиши Ўзбекистоннинг кўп партиявийлик тизимида муҳим қадам бўлди. «Адолат» партияси, Ўзбекистондаги сиёсий жамиятда янги авлоднинг овози, адолатни, тенгликни ва демократик қадриятларни тарғиб қилувчи куч сифатида пайдо бўлди.
«Адолат» партиясининг ташкил этилиши Ўзбекистоннинг ўша даврдаги сиёсий тарихида муҳим бир босқични ташкил этди. Бу сиёсий жараённинг амалга ошиши, давлат бошқарувининг кўп партиявий ва эркин сайлов тизимига кўчишини кўрсатди. «Адолат» партияси нафақат янги сиёсий кучни яратди, балки Ўзбекистондаги демократия ва эркинликларни ривожлантиришда муҳим роль ўйнади.
Ўша даврда Ўзбекистонда «Адолат» партиясининг ташкилий тузилмаси кенгайди. Ҳар бир вилоят ва туманларда партиянинг кенгашлари ташкил этила бошлади. Бу кенгашлар партиянинг минтақавий даражадаги фаолиятини мустаҳкамлади ва янги сиёсий тизимда партиянинг кенгроқ фаолият юритишига имкон яратди.
Бухоро вилоятида эса, «Адолат» партиясининг кенгаши илк бор Бухоро давлат тиббиёт институтида ташкил этилди. Кенгаш раиси сифатида Раҳмат Аҳмедов тайинланди, у партиянинг Бухоро вилоятидаги ишларини самарали бошқаришга ва янги сиёсий эркинликларни жорий этишга муносиб ҳисса қўшди.
«Адолат» партиясининг асосий электорати зиёлилардан иборат эди. Партия келажак авлодни тарбиялайдиган инсонларни қўллаб-қувватлашга ва янги, адолатли жамиятни қуришга йўналтирилган эди. Зиёлилар, партиянинг асосий кучи сифатида, мамлакатнинг сиёсий ва ижтимоий ислоҳотларида фаол иштирок этишлари керак эди. Бу эса, ўз навбатида, Ўзбекистонни ривожлантириш ва халқнинг ҳақ-ҳуқуқларини ҳимоя қилиш йўлидаги энг муҳим йўналишлардан бири сифатида белгиланди.
Мустақилликнинг дастлабки йилларида республика Олий Мажлисида янги қонунлар ишлаб чиқилиши ва халқнинг сиёсий иштирокини, уларнинг ҳуқуқларини таъминлаш борасида кўп ишлар қилиниши зарур эди. Ана шу жараёнда Пўлатжон Шаропов «Адолат» партиясининг вакили сифатида фаол иштирок этди.
– “Адолат” партиясининг ўша даврдаги асосий маслакларидан бири юртимизда мустақилликни мустаҳкамлашга қаратилган эди. Бу борада партия вакиллари жонбозлик кўрсатдилар десам, хато бўлмайди. Йиллар давомида партия ўз номини оқлади, олдига қўйган мақсадларига эришди. Келгусида ҳам партия мамлакат ҳаётида кўп янгиликлар яратишига, сиёсий ҳаётда кашшофлик қилишига ишонаман, – дейди Пўлатжон Шаропов.
Ҳақиқатан ҳам, партиянинг катта авлодлари бошлаб берган улуғвор ишларнинг ворислик анъаналарини бугунги ёшлар давом эттиришлари аниқ. Партия босиб ўтган 30 йиллик тарих шундан гувоҳлиқ беради.
Моҳигул Раҳимқулова,
Бухоро вилоят кенгаши матбуот котиби