Андишани, ориятни ҳар нарсадан устун қўйган халқимизда “кўз-кўзга тушади” деган бир нақл бор. Ўйлашимча, бу кўп вазиятларда бизнинг зараримизга ҳам ишлайди. Депутатликка сайланганимдан буён фаолиятим давомида Жомбой тумани аҳолисининг жуда кўпи билан суҳбатлашдим, мурожаатларини тинглаб, фуқароларнинг қонуний ҳақ-ҳуқуқларини таъминлашга, муаммоларига ечим топишга ҳаракат қилиб келмоқдаман. Сўз бошида бежизга “кўз-кўзга тушади” деган иборани ёдга олмадим, учрашувлар мобайнида аксарият фуқаролардан сизга бирор ёрдам керакми деганимизда, минг истиҳолада “Депутат синглим, айтсам халқ орасида “ёзувчи” деган дашномга қолиб кетишдан қўрқаман-да”, қабилидаги гапларни эшитаман.
Албатта, орамизда “ўзининг ҳаққини талаб қилувчи” қўштирноқ ичидаги “ёзувчи”лар ҳам бор. Яқинда бўлиб ўтган воқеа менга очиқчасига ўшандай “ёзувчи”лар билан юқоридаги ўз ҳаққини талаб қилишга ийманадиганлар орасидаги фарқни яққол кўрсатиб берди.
Барчамиз иссиқ жонмиз. Совуқ кунлар тушиши билан иссиқ бошпана томон ошиқамиз. Аммо бу имконият ҳаммада ҳам борми? Фуқаролар билан сайлов ҳудудидаги муаммоларни ўрганиш, уларни қонунчиликдаги янгиликлар билан таништириш, ҳуқуқий саводхонлик бўйича тушунчалар бериш мақсадида “Оқ олтин” маҳалла фуқаролари йиғинидаги аҳоли билан учрашувга ошиқдим. Учрашув бошланишидан аввал менга ҳамроҳлик қилган маҳалла раисининг ўринбосари таклифи билан қишлоқнинг чекка ҳудудидаги хонадонларга бордик. Бир хонадонда икки опа-сингил яшашар экан. Иккиси ҳам қирқдан ошган. Боқувчиси йўқ, турмушга чиқмаган, яқинларидан фақат укаси бор. Уканинг ҳам топиш-тутиши ҳаминқадар, ўзининг рўзғоридан ортмайди.
Хонадоннинг ташқи кўриниши ҳаминқадар, ичкарига юзландик, икки хона ва бир даҳлиздан иборат уйнинг на шифти-патологи бор, на гилам, ва на кўрпа-ёстиғи. Кираверишга тўшалган кичкина шолча-гилам эътиборимни тортди. Улар билан бўлиб ўтган суҳбат жараёнида бу шолча-гилам опа-сингиллар учун тўшак, эски кийим бошлардан қўлбола тайёрланган қоп эса ёстиқ вазифасини бажариши маълум бўлди. Бисотидаги битта катта кўрпа эса қўшнининг “ҳадяси” экан.
Ҳамроҳимга ич-ичидан эзилиб тикиламан. У киши опа-сингил “Аёллар дафтари”да рўйхатда туришини, уларга маҳалла томонидан кўмак берилаётгани, саховатли кишилар, ҳомийлар томонидан озиқ-овқат ва бошқа зарурий нарсалар билан таъминланиб келинаётгани, яқинда уларга пишириқ печи тақдим этилгани, бу опа-сингиллар “ёзувчи”лардан эмаслигини, мурожаат қилишга истиҳола қилишини, депутатнинг учрашуви бўладиган вақтда ҳам келиб таклиф этишганида боришмаганини ва яна нималар ҳақидадир гапирди.
“Қўлдан берганга қуш тўймас”, деган гап бежизга айтилмаган. Берилаётган маҳсулотлар уларнинг яшаши учун кифоя қилмайди, албатта. Кечаси қаерда тунаши ҳақида қизиқдим. Ахир иситиш тизими бўлмаган уйда қандай яшаш мумкин?!
– Уйни истиш учун қўлбола печка ўрнатиб, олов ёқиб кўрдик, – дейди улардан бири. – Шифтлар очиқ, иссиқликни дарров тортиб кетади. Уйни иситишнинг иложи бўлмади. Аммо биз бу ерда – ертўлада ётамиз! У ер анча иссиқ! Мана, қаранг, пастга пишиқ ғиштдан териб олганмиз, устига селофан тўшаб, шолча-гиламни тўшаб ётамиз. Жой кичик бўлгани учун тез совиб кетмайди.
Бўғзимга нимадир тиқилди… Ўзимни халқ вакили деб кўкрак кериб, бир-иккита муаммонинг ечимида кўмаклашганимга масрур бўлиб юрганимдан уялиб кетдим…
“Йиғламаган болага эътибор йўқ”, дея юраверган эканмиз… Таажжубланасан киши, наҳотки, ҳали ҳам, ҳозирги замонда ҳам орамизда шундай инсонлар бор!
Шукрки, бугун давлатимиз раҳбари томонидан биз, депутатларга ишонч билдирилиб, жуда катта имкониятлар яратиб берилмоқда. Муҳтарам Юртбошимизнинг биргина “Депутатга беписандлик – бу халққа беписандликдир”, деган халқчил иборалари барча депутатларга куч берди, десам янглишмайман. Ушбу ваколат ва имкониятлардан тўлақонли фойдаланиш эса ўзимизга боғлиқ.
Опа-сингиллар ҳолати бугун қандай деб қизиқаётгандирсиз. Ҳа, бугун бу икки опа-сингил туманда ташкил этилган ижтимоий уйларга жойлаштирилди. Энди уларнинг ҳам иссиқ турар жойлари бор.
Комила УМАРОВА,
халқ депутатлари Жомбой туман Кенгаши депутати